طريقة عمل فرخه محشيه رز ومشويه في الفرن.
عندك عزومة ومحتارة تعملي أكل ايه، زهقتي من طرق الفراخ التقليدية، نفسك تعملي صنف اكل جديد، يبقي لازم تجربي الطريقة دي الفرخه المحشيه رز في الفرن.
مكونات فرخه محشيه رز ومشويه في الفرن.
- • فرخة وزنها كيلو الي كيلو ونص مغسولة جيدا، ومنقوعة في محلول النقع وهو عبارة عن ( ماء مع ملح وليمون وخل) منقوعة من ساعة لساعتين.
- بنسلك الجلد كويس ونسيب طرف مقفول
- التتبيلة الخاصة بالفرخه المحشية.
- عصير بصلتين مبشورين * احتفظي بالبصل هنحتاجة للرز*
- عصير ٢ طماطم
- ملعقة كبيرة خل
- معلقة صلصة
- معلقة كبيرة زيت
- معلقة كبيرة ملح او حسب رغبتك
- معلقة صغيرة من البهارات الآتية:
- الفلفل الاسمر والكزبرة والكاري والكمون والبابريكا والسماق.
قومي بخلط كل هذه المكونات مع بعضها.
في بوله هنعصر البصل المبشور كويس ونضيف عليهم عصير الطماطم والبهارات والزيت والخل والصلصة. * هنحتاج البصل المبشور لحشوة الرز*
قومي بتصفية التتبيلة بواسطة مصفاة ضيقة.
احتفظي بنص كوباية من التتبيلة لتضعيها على حشوة الرز في الفرخه المحشيه.
أهم خطوة في طريقة الفرخه المحشيه رز في الفرن.
قومي بإحضار أداة حقن اللحوم، وإذا لم تكن متوفرة استخدمي سرنجة كبيرة من الصيدلية مقاس 10.
هناخد من التتبيلة في أداة حقن اللحوم ونبدأ نحقن الفرخه في اللحم بتاعها نفسه كأنك بتديها حقنة 😂.
طريقة عمل رز حشوة الفرخه المحشيه في الفرن.
في حله أو طاسه حطي ملعقتين من الزيت ونضيف البصل المبشور المتصفي الباقي من تتبيلة الفرخه المحشيه.
نشوح البصل ونضيف إليه الملح والفلفل والكمون وبعد ما البصل ياخد اللون الذهبي ننزل عليه بنص كوباية التتبيلة المتبقية من تتبيلة الفرخه المحشيه.
ضيفي الرز علي البصل بالتتبيلة.
نضيف نص كوباية من الماء الساخن.
نسيب الرز يشرب الميه مش عاوزينه يستوي على النار ولا يبقي ني * هيبقي نص سوا*
طريقة حشو الفرخه المحشيه رز في الفرن.
بعد ما الرز يبرد ويهدأ، قومي بإحضار الفرخه المتبلة واحشيها بالرز، واحشني بين الجلد واللحم زي الحمام كده* خلي بالك لتقطعي الجلد بتاع الفرخه*
اقفلي الفرخه بخلة اسنان أو خيط.
طريقة تحضير دهان الفرخه المحشيه رز في الفرن
- معلقتين زبدة او سمنه.
- فصين توم مهروسين.
- معلقة زعتر
اخلطي مكونات الدهان مع بعضها وادهني بيها الفرخه المحشيه رز.
طريقة تسوية الفرخه المحشية رز في الفرن.
ضعي الفرخه المحشيه رز في صينية ودخليها في فرن مسخن مسبقا على درجة حرارة 200 من ساعة لساعة ونص.
هتكون استوت والوش اتحمر.
تقدم مع الرز الابيض او رز بالكبد والقوانص او رز بالخلطة أو رز معمر.